26/06/2024
Խոհարարական դիվանագիտության ծրագրի նպատակն էր խթանել կայուն սննդային շղթան ու խոհարարական ձեռներեցությունը, ուստի շեֆ-խոհարար Մերի Սյու Միլիկենն անցկացրեց կլիմայամետ խոհարարական մրցույթ, որի շրջանակում ուսանողները պատրաստեցին ուտեստներ՝ օգտագործելով բաղադրիչներ, որոնք չեն վնասում մոլորակին և բաղադրիչներ, որոնք առօրյայում մարդիկ հաճախ «սննդային թափոն» են համարում։
Մրցույթի արդյունքները գնահատեցին Հայաստան պաշտոնական այցով ժամանած ԱՄՆ պետքարտուղարության Նահանգային ու քաղաքային դիվանդագիտության հարցերով հատուկ ներկայացուցիչ Նինա Հաչիգյանը, շեֆ-խոհարար Մերի Սյու Միլիկենն ու «Երեմյան ակադեմիայի» «Խոհարարական արվեստ» ուսումնական ծրագրերի ղեկավար, շեֆ-խոհարար Կարեն Խաչատրյանը։
«Ես հիացած և տպավորված եմ ուսանողներով և «Երեմյան ակադեմիայիով»։ Այս ակադեմիան ոչնչով չի զիջում ԱՄՆ-ում իմ այցելած կրթական հաստատություններին իր բարձր որակով: Ես այսօր մեծ ոգևորությամբ փորձեցի ուսանողների պատրաստած ուտեստները: Նրանք իրենց ստեղծարարությամբ և բանիմացությամբ փայլեցին մրցույթում, և ես մեծ բավականություն ստացա այդ փորձառությունից։ Նրանք տիրապետում են բազում պրոֆեսիոնալ հմտությունների, ինչը կարող են արդեն իսկ կիրառել գործնականում»,- նշել է շեֆ-խոհարար Մերի Սյու Միլիկենը։
