11/12/2024
Խոհարարական արվեստի և հյուրընկալության Երեմյան Ակադեմիայի 5-ամյակի միջոցառումների շրջանակում տեղի ունեցավ մրցանակաբաշխություն և Ակադեմիային նվիրված ֆիլմի փակ դիտում։
Միջոցառմանը ներկա էին «Երեմյան» ընկերությունների խմբի հիմնադիր և գլխավոր տնօրեն Դավիթ Երեմյանը, Ակադեմիայի տնօրեն Աիդա Տիգրանյանը, դասախոսական կազմը, շրջանավարտներ, ուսանողներ և գործընկերներ։
Իր ողջույնի խոսքում Դավիթ Երեմյանը նշեց․ «Եվս մեկ անգամ ամփոփելով ակադեմիայի 5-ամյա գործունեությունը՝ չեմ կարող չարձանագրել, որ այս տարիների ընթացքում մենք ունեցել ենք շուրջ 2000 շրջանավարտ, և նրանց 90 տոկոսն այսօր Երևանի ռեստորաններում աշխատում են՝ հետաքրքրացնելով և գեղեցկացնելով այդ ռեստորանները և իրենց ներդրումն ունենում ոլորտի զարգացման գործում»։ Երեմյան ընկերությունների խմբի հիմնադիրը և գլխավոր տնօրենն ընդգծեց նաև, որ այս 5 տարիներն Ակադեմիայի համար լուրջ փորձաշրջան էին՝ ապացուցելով, որ այն ճիշտ ուղով է առաջ շարժվում և մնայուն արժեքներ ստեղծում ոլորտի համար։
Ակադեմիայի տնօրեն Աիդա Տիգրանյանը, ողջունելով ներկաներին, ներկայացրեց ձեռքբերումներն ու ապագայի նպատակները՝ շեշտելով՝ դեռ բազմաթիվ առիթներ են լինելու նշելու Ակադեմիայի հաջողությունները և առաջընթացը։
Այնուհետ Ակադեմիայի շրջանավարտներին և ուսանողներին վկայականներ հանձնվեցին «Լավագույն ուսանող», «Լավագույն շրջանավարտ» և այլ անվանակարգերում։
Արդյունավետ համագործակցության համար շնորհակալագրեր հանձնվեցին «Երեմյան» ընկերությունների խմբի ռեստորանների ներկայացուցիչներին՝ Ակադեմիայի ուսանողներին հյուրընկալելու և ուղղորդելու համար։
Միջոցառման ավարտին ցուցադրվեց Ակադեմիայի 5-ամյակին նվիրված ֆիլմը, որը պատմում է Ակադեմիայի աշխատանքի ուղղությունների մասին՝ ստեղծումից մինչև միջազգային բազմաբնույթ համագործակցություններ, դասընթացներից մինչև գործընկերներ, ծրագրեր և այլն:
